იონიის ზღვის უდიდესი მთიანი კუნძული კეფალონია მდებარეობს ითაკას, ზაკინთოსსა და ლეფკადას შორის.
ულამაზეს ადგილობრივ პეიზაჟებში ჭარბობს მწვანე ფერი. ტურისტების ინტერესს იწვევს კუნძულის მყუდრო სოფლები: ადგილობრივი მაცხოვრებლების მოწესრიგებული სახლები, რომლებიც ტრადიციულ სტილშია აგებული, ეზოები, ბაღები და აივნები ულამაზესი და მრავალფეროვანი ყვავილებით. 1953 წლის მიწისძვრამ გაანადგურა ვენეციელების ოკუპაციის ეპოქაში აშენებული მდიდრული შენობები. თუმცა ეს არ ნიშნავს იმას, რომ კეფალონიაზე სანახავი არაფერი დარჩა.
ჩამოსვლის პირველივე წუთებში კეფალონია თქვენს გაოცებას დაიწყებს. ლეგენდარულ კუნძულზე სუფევს ცხოვრების გიჟური რიტმით. აქ დაგხვდებათ ხმაურიანი მოედნები, ფერადი ადგილობრივი ბაზრები, ვიწრო მიხვეულ-მოხვეული ქუჩები, მაცხოვრებლების ტრადიციული სახლები, კაფეები, რომლებიც ტურისტებს სთავაზობენ ეროვნული ტკბილეულის დაგემოვნებას.

კეფალონიის პლაჟები
ადგილობრივი პლაჟები აღიარებულია მსოფლიო რეიტინგებით და ასევე მათი უმეტესობა დაჯილდოვებულია ლურჯი დროშით. ეს საერთაშორისო ჯილდო გადაეცემა მხოლოდ იმ პლაჟებს, რომლებიც აკმაყოფილებენ უმაღლეს სტანდარტებს. კეფალონიის სანაპიროების უნიკალურობას ადასტურებს ყოველწლიურად აქ ჩამოსული ტურისტების რაოდენობა.

მირტოს
მირტოსი კუნძულის საუკეთესო პლაჟად არის აღიარებული. კლდეების ბუნებრივი განლაგების გამო პლაჟი დაცულია ქარისგან. მისი გამწვანებული ტერიტორია სხვადასხვა ქვეყნიდან ჩამოსული სტუმრების საყვარელი ადგილია. მირტოსის წყლები გამოირჩევა ფერების მრავალფეროვნებით: ღია ცისფერი ნელნელა ერწყმის მუქლურჯს. 2006 წელს Forbes-მა აღნიშნა პლაჟის სისუფთავე და კეთილმოწყობა და შეიყვანა იგი სანაპიროების პრესტიჟულ სიაში.

ქსი
კიდევ ერთი უნიკალური ადგილი არის პლაჟი ქსი. ქვიშის საოცარი ფერი, რომელიც ბურგუნდიულ ღვინოს მოგვაგონებს, მაგნიტივით იზიდავს მოგზაურებს. სანაპიროს გააჩნია სამკურნალო თვისებები. ბალნეოთერაპია ყველასთვის ხელმისაწვდომია ტალახის აბაზანების მიღების შესაძლებლობის წყალობით. პლაჟი შესანიშნავია ბავშვებთან ერთად დასვენებისთვის.

ანტისამოსი
მდებარეობს ტურისტულ ზონაში, რისგამოც პლაჟი მუდამ ხალხმრავალია. იგი საკმაოდ კეთილმოწყობილია, აქ დაგხვდებათ შეზლონგები, მზის ქოლგები, ტუალეტები, გამოსაცვლელი კაბინები, კაფეები და ტავერნები. სანაპიროს გააჩნია ასევე პარკინგი.

დაფნუდი
თუ გსურთ დატკბეთ ჰარმონიით და სიმყუდროვის შეგრძნებით გაემგზავრეთ დაფნუდში.

სკალა
კეთილმოწყობილი, გრძელი სანაპირო. ამ ადგილას ზღვა ღრმავდება ნაპირიდანვე. პლაჟზე დაგხვდებათ წყლის აქტივობების დიდი არჩევანი. შეგიძლიათ იქირაოთ შეზლონგი და ქოლგები. არის გასახდელები და საშხაპეები. მთავარ შესასვლელთან ფუნქციონირებს ბარი.

ღირსშესანიშნაობები

არგოსტოლიონი
კუნძულის დედაქალაქი და მთავარი პორტი. მე-17 საუკუნეში მოსახლეობა მთიან რაიონში მდებარე ძველი დედაქალაქიდან გადმოსახლდა თვალწარმტაც ყურეში. ამან დიდი ბიძგი მისცა ქალაქის ეკონომიკურ განვითარებას. არგოსტოლიონმა დაამყარა ძლიერი სავაჭრო ურთიერთობა მეზობელ კუნძულებთან. სწრაფმა აყვავებამ დედაქალაქის პორტი ერთ-ერთ ყველაზე მნიშვნელოვან პორტად აქცია მთელ საბერძნეთში.
ვენეციური ეპოქა მნიშვნელოვნად აისახა ქალაქის შენობებში. სამწუხაროდ, მე-20 საუკუნის მიწისძვრამ ძველი შენობების მნიშვნელოვანი ნაწილი გაანადგურა. მათი აღდგენა და რესტავრაცია ვერ მოხერხდა.
თანამედროვე დედაქალაქი პოპულარულია ტურისტებში. ქალაქის ინფრასტრუქტურა კარგად არის განვითარებული. საღამოობით სასიამოვნოა ქალაქის ბულვარზე გასეირნება, როცა ზღვიდან მსუბუქი ნიავი უბერავს.
პლატია ვალიანუ ქალაქის ცენტრალური მოედანია, სადაც განლაგებულია სხვადასხვა ტრადიციული ტავერნები, ბარები და რესტორნები. მოედანი ყოველთვის ხალხმრავალი და ხმაურიანია.

წმინდა ანდრიას მონასტერი
წმინდა ანდრიას მონასტერი ერთ-ერთი ყველაზე ცნობილი და მნიშვნელოვანია კუნძულზე. მას მდიდარი და საინტერესო ისტორია აქვს.
მე-16 საუკუნეში სულიერმა დებმა მაგდალინელმა, ლეონდიამ და ბენედიქტამ დააარსეს პატარა მონასტერი. მონასტერი აღმართეს ანდრეა მოციქულის სამლოცველოს ადგილზე. მე-17 საუკუნეში ბერძენ-რუმინელმა პრინცესამ როქსანამ, რომელიც სასწაულებრივად გადაურჩა გემის ჩაძირვას, მონასტრის საჭიროებებს შესწირა შთამბეჭდავი თანხა და უძრავი ქონება. მან ტაძარს ათონზე მდებარე წმ. ანდრია პირველწოდებულის წმინდა ნაწილები გადასცა. შემდეგ კი თავად აღიკვეცა მონაზვნად.
მე-19 საუკუნეში მონაზვნებსა და ბრიტანულ მმართველობას შორის უთანხმოების შედეგად მონასტერმა დროებით შეწყვიტა ფუნქციონირება. მონაზვნებმა თაბაშირის სქელი ფენის ქვეშ გადამალეს ეკლესიის ბრწყინვალე ფრესკები.
ძლიერი მიწისძვრის შედეგად მონასტერი საგრძნობლად დაზიანდა და თითქმის ჩამოინგრა. საშინელი ბუნებრივი მოვლენის შემდეგ გამოჩნდა ოდესღაც გადამალული წარმოუდგენელი ძველი ძვირფასი ფრესკები.
დღეს აღდგენილი მონასტრის მთავარი სიწმინდეა ანდრია პირველწოდებულის ფეხის ნაწილი ჯვარცმის კვალით.

ენოსის ეროვნული პარკი
ენოსის ეროვნული პარკი მდებარეობს ამავე სახელწოდების მთაზე, ზღვის დონიდან 1300 მ სიმაღლეზე. იგი მდიდარია მრავალფეროვანი ველური ფლორითა და ფაუნით.
აქ შეგიძლიათ შეხვდეთ იშვიათ ველურ ცხენებს. ბუნებრივ პარკში მოფენილია მრავალი ყვავილი, მათ შორის ველური ორქიდეები, იები, მაგნოლიები. აქ ხარობს უნიკალური ნაძვი. ლეგენდის თანახმად, სწორედ ამ ნაძვებიდან ააგო ოდისევსმა ხომალდი.
ეროვნულ პარკს აქვს საფეხმავლო ბილიკები, რომლებიც განსხვავდება მანძილითა და სირთულით. პარკის ტერიტორია აღჭურვილია დასასვენებელი ადგილებით, სადაც შეგიძლიათ კარვის გაშლა.

მიწისქვეშა ტბა მელისანი
მიწისქვეშა გამოქვაბული და მელისანის ტბა კუნძულის არაჩვეულებრივი ბუნებრივი ღირსშესანიშნაობაა.
მრავალი ლეგენდა უკავშირდება უნიკალური გამოქვაბულის გაჩენას, გეოლოგები კი თვლიან, რომ უნიკალური თვალწარმტაცი ადგილი წარმოიშვა ხანგრძლივი ბუნებრივი პროცესის - ქანების დაშლის შედეგად. ზღვა და მტკნარი წყალი გამოქვაბულში ჩაედინება და წარმოქმნის განსაცვიფრებელ ტბას, რომელიც დაახლოებით 20 ათასი წლისაა.
4 ათასზე მეტი წლის წინ მიწისძვრამ გაანადგურა გამოქვაბულის გუმბათი. მზის სხივები, რომლებიც ეცემა კრისტალურად სუფთა წყალზე, ქმნის ზღაპრული სილამაზის სურათს.
1951 წელს მოხეტიალე მწყემსმა შემთხვევით აღმოაჩინა ეს ბუნებრივი ღირსშესანიშნაობა. მოგვიანებით კი მღვიმე გაიხსნა ვიზიტორებისთვის.
ტურისტებისთვის აშენდა კიბე, რომელიც მიდის მიწისქვეშა გვირაბამდე. ააგეს ნავსაყუდელი, საიდანაც გადიან პატარა ნავები კრისტალურ წყლებში სამოგზაუროდ. გამოქვაბულში ნავით მოგზაურობა დაუვიწყარ ემოციებს ტოვებს.

წმინდა გერასიმეს მონასტერი
წმინდა გერასიმეს მონასტერი კეფალონიის მთავარი სალოცავია. გერასიმე კეფალონიელს მოსახლეობა კუნძულის მფარველ წმინდანად მიიჩნევს.
წმინდა გერასიმეს რელიგიური გზა ათონის მთაზე დაიწყო, სადაც იგი ბერად აღიკვეცა. 10 წელზე მეტი ხნის განმავლობაში იერუსალიმში მღვდლად მსახურობის შემდეგ, იგი კრეტასა და ზაკინთოსზე მოღვაწეობდა. 1555 წლისთვის წმინდა გერასიმემ იპოვა თავისი სახლი კეფალონიაში. 1662 წელს იგი წმინდანად შერაცხეს.
თავდაპირველად ის სოფელ ლასის გამოქვაბულში ცხოვრობდა. რამდენიმე წლის შემდეგ მან დააარსა მონასტერი ომალას ხეობაში და მას "ახალ იერუსალიმს" უწოდებდა.
მონასტერი დღეს მომლოცველების ცენტრია. მისი მთავარი სიწმინდე გერასიმე კეფალონიელის უხრწნელი სხეულია.

მუზეუმები

არქეოლოგიური მუზეუმი მდებარეობს ცენტრალურ მოედანთან. მუზეუმს აქვს სამი საგამოფენო გალერეა. მათში წარმოდგენილია კუნძულ კეფალონიის გათხრების დროს აღმოჩენილი სხვადასხვა ეპოქის ექსპონატები: სამკაულები, კერამიკული ჭურჭელი, სარიტუალო ნივთები, ქანდაკებები, მონეტები, საყოფაცხოვრებო იარაღი და მრავალი სხვა.
ისტორიულ-ფოლკლორული მუზეუმი, რომელიც მდებარეობს არგოსტოლიონში, თავისი კომპოზიციით სრულად ასახავს კუნძულის ისტორიულ ტრადიციებსა და კულტურას. აქ გამოფენილია ბიზანტიური ეპოქის ექსპონატები: ჭურჭელი, კერამიკა და კიდევ რამდენიმე ხატი. მუზეუმის ბიბლიოთეკაში და არქივში ინახება ხელნაწერების, დოკუმენტების, პორტრეტების, წიგნების, ფოტოებისა და ნახატების უზარმაზარი კოლექცია.
სოფელ ფარსესში მდებარე საზღვაო მუზეუმი სტუმრებს წარუდგენს გემების მოდელებს, ფოტოსურათებს და საზღვაო თემატიკის ნახატებს.
წმინდა ანდრიას მონასტერში ფუნქციონირებს ბიზანტიური ხელოვნების მუზეუმი. მისი ექსპოზიცია შედგება უძველესი ხატებისგან, ხელნაწერებისგან, და სხვა საეკლესიო ნივთებისაგან, რომლებიც ნაპოვნია კუნძულის მიტოვებულ და დანგრეულ ეკლესიებში.